తెలంగాణ, ఏపీ రాజధానుల అనుసంధానం
భారత్ ఫ్యూచర్ సిటీ నుంచి బందర్ పోర్ట్ వరకు 12 వరుసల గ్రీన్ఫీల్డ్ రహదారిని త్వరగా మంజూరు చేయాలని ముఖ్యమంత్రి గారు కోరారు. రాష్ట్ర పునర్విభజన చట్టం ప్రకారం తెలంగాణ, ఆంధ్రప్రదేశ్ రాజధానుల మధ్య గ్రీన్ఫీల్డ్ రోడ్డు నిర్మించాల్సి ఉందని ఆయన గుర్తు చేశారు. తెలంగాణకు సముద్ర రేవు లేనందున బందర్ పోర్ట్ వరకు సరుకు రవాణాకు వీలుగా ఈ గ్రీన్ఫీల్డ్ రహదారి మంజూరు చేయాలని విజ్ఞప్తి చేశారు. ఈ రహదారిలో 118 కిలోమీటర్లు తెలంగాణలో, మిగతా భాగం ఏపీలో ఉంటుందని సీఎం వివరించారు. ఈ విషయంలో తమ శాఖ అధికారులను హైదరాబాద్కు పంపుతానని, త్వరలో సమీక్షిస్తామని కేంద్ర మంత్రి హామీ ఇచ్చారు.
హైదరాబాద్ రింగ్ రోడ్డు, శ్రీశైలం ఎలివేటెడ్ కారిడార్
హైదరాబాద్ రీజినల్ రింగ్ రోడ్డు (నార్త్)కు సంబంధించి ఫైనాన్షియల్, క్యాబినెట్ అనుమతులు ఇచ్చి పనులు వెంటనే ప్రారంభించాలని ముఖ్యమంత్రి కోరారు. ఆర్ఆర్ఆర్ (నార్త్)కి సమాంతరంగా ఆర్ఆర్ఆర్ (సౌత్) పనులు చేపట్టి, అందుకు అవసరమైన అనుమతులు మంజూరు చేయాలని విజ్ఞప్తి చేశారు.
అలాగే, హైదరాబాద్ను ప్రసిద్ధ పుణ్యక్షేత్రం శ్రీశైలంతో కలిపే మన్ననూర్-శ్రీశైలం రహదారి అమ్రాబాద్ టైగర్ రిజర్వ్ పరిధిలో ఉన్నందున, అక్కడ 4 వరుసల ఎలివేటెడ్ కారిడార్ నిర్మాణానికి అనుమతులు ఇవ్వాలని కోరారు. ఈ కారిడార్ పూర్తయితే ఏపీలోని కృష్ణపట్నం పోర్ట్తో పాటు మార్కాపురం, కంభం, కనిగిరి, నెల్లూరులకు రాకపోకలు సులభమవుతాయని చెప్పారు.
మరికొన్ని రోడ్డు ప్రాజెక్టులు
* హైదరాబాద్-మంచిర్యాల మధ్య ఉన్న రాజీవ్ రహదారిపై రద్దీ ఎక్కువగా ఉన్నందున, కొత్తగా గ్రీన్ఫీల్డ్ రహదారిని మంజూరు చేయాలని ముఖ్యమంత్రి విజ్ఞప్తి చేశారు.
* సీఆర్ఐఎఫ్ కింద రూ.868 కోట్లతో పంపిన రహదారుల పనులకు అనుమతులు ఇవ్వాలని కోరారు. దీనికి సానుకూలంగా స్పందించిన గడ్కరీ గారు, వారం రోజుల్లోగా అనుమతులు ఇస్తామని తెలిపారు.
* రావిర్యాల - ఆమన్గల్ - మన్ననూర్ మధ్య 4 వరుసల గ్రీన్ఫీల్డ్ రహదారిని నిర్మించాలని కోరారు.
ఈ సమావేశంలో ఎంపీలు రేణుకా చౌదరి, డాక్టర్ మల్లు రవి, పోరిక బలరాం నాయక్, రామసహాయం రఘురాంరెడ్డి, చామల కిరణ్ కుమార్ రెడ్డితో పాటు ఉన్నతాధికారులు పాల్గొన్నారు.
