తెలంగాణ ముఖ్యమంత్రి రేవంత్ రెడ్డికి భారత వికలాంగుల హక్కుల పరిరక్షణ సమితి హెచ్చరిక
భువనగిరి, జూలై 18:
వృద్ధులు, వితంతువులు, గీత కార్మికులు, ఒంటరి మహిళలు, వికలాంగుల పెన్షన్లను పెంచకుంటే తెలంగాణ ముఖ్యమంత్రి రేవంత్ రెడ్డి ప్రభుత్వానికి భవిష్యత్తు లేకుండా చేస్తామని భారత వికలాంగుల హక్కుల పరిరక్షణ సమితి రాష్ట్ర అధ్యక్షులు గిద్దె రాజేష్ హెచ్చరించారు. అసెంబ్లీ ఎన్నికల సమయంలో కాంగ్రెస్ పార్టీ ఇచ్చిన హామీలను నిలబెట్టుకోవాలని డిమాండ్ చేశారు. ఆగస్టు 13లోగా ఎన్నికల హామీ మేరకు పింఛన్లు పెంచకుంటే ముఖ్యమంత్రి రేవంత్ రెడ్డి రాజీనామా చేయడానికి సిద్ధంగా ఉండాలని ఆయన సూచించారు.
బస్వాపురంలో వికలాంగుల హక్కుల పోరాట సమితి సమావేశం
భువనగిరి మండలం బస్వాపురం గ్రామంలో శుక్రవారం వికలాంగుల హక్కుల పోరాట సమితి జాతీయ ప్రధాన కార్యదర్శి, ఉమ్మడి నల్గొండ జిల్లా ఇంచార్జ్ గడ్డం కాసిం అధ్యక్షతన వృద్ధులు, వితంతువులు, గీత కార్మికులు, బీడీ కార్మికులు, ఒంటరి మహిళలు, వికలాంగుల చేయూత పింఛన్దారుల గ్రామ సదస్సు జరిగింది. ఈ సదస్సుకు ముఖ్య అతిథిగా హాజరైన గిద్దె రాజేష్ మాట్లాడుతూ, అసెంబ్లీ ఎన్నికల సమయంలో కాంగ్రెస్ పార్టీ అధికారంలోకి వస్తే అదే నెల నుండి వృద్ధులు, వితంతువులు, గీత కార్మికులు, బీడీ కార్మికులు, ఒంటరి మహిళల పెన్షన్ ₹4,000 కు, వికలాంగుల పెన్షన్ ₹6,000 కు పెంచుతామని పీసీసీ అధ్యక్షుని హోదాలో ముఖ్యమంత్రి రేవంత్ రెడ్డి అనేక బహిరంగ సభల్లో పేర్కొన్నారని గుర్తు చేశారు.
నెరవేరని హామీలు, భవిష్యత్ ఆందోళనలు
అధికారంలోకి వచ్చి ఏడాదిన్నర పాలన పూర్తయినా పెన్షన్ దారులకు ఇచ్చిన హామీని నెరవేర్చకుండా, అడుగడుగునా పెన్షన్ దారుల పట్ల వివక్ష ప్రదర్శిస్తున్న తీరు బాధాకరమని గిద్దె రాజేష్ ఆవేదన వ్యక్తం చేశారు. ఎన్నికల్లో ఇచ్చిన హామీ మేరకు ఆగస్టు 13లోగా పింఛన్లు పెంచకుంటే రాజీనామా చేయడానికి ముఖ్యమంత్రి రేవంత్ రెడ్డి సిద్ధంగా ఉండాలని ఆయన పునరుద్ఘాటించారు. లేకుంటే దళిత పీడిత వర్గాల ఆశాజ్యోతి, పద్మశ్రీ అవార్డు గ్రహీత, మాదిగ రిజర్వేషన్ పోరాట సమితి వ్యవస్థాపకులు మంద కృష్ణ మాదిగ సారథ్యంలో రాష్ట్ర రాజధాని హైదరాబాద్ను దిగ్బంధించడంతో పాటు, రాష్ట్రవ్యాప్తంగా ఆందోళన కార్యక్రమాలను ఉధృతం చేస్తామని హెచ్చరించారు.
ఇతర డిమాండ్లు
తమ ఆందోళనల కంటే ముందే ముఖ్యమంత్రి రేవంత్ రెడ్డి స్పందించి, పెన్షన్ దారులకు ఎన్నికల్లో ఇచ్చిన హామీ మేరకు పెన్షన్లను పెంచాలని, అలాగే వికలాంగులకు ఇచ్చిన ఇతర హామీలైన ఆర్టీసీలో ఉచిత రవాణా సౌకర్యం, రాష్ట్రంలో వికలాంగుల బ్యాక్లాగ్ ఉద్యోగాల భర్తీ, రాష్ట్రంలో వికలాంగుల అట్రాసిటీ చట్టం సమర్థవంతంగా అమలు, రాష్ట్రంలో వికలాంగుల సంక్షేమ శాఖను ప్రత్యేక శాఖగా గుర్తించి ప్రత్యేక అధికారులను నియమిస్తామన్న హామీలను వెంటనే నెరవేర్చాలని డిమాండ్ చేశారు.
ఈ సమావేశంలో సంఘం యాదాద్రి భువనగిరి జిల్లా ఉపాధ్యక్షులు కరుణాకర్ మచ్చ, ఉపేందర్, నిమ్మల సత్యమ్మ, బరిగే కృష్ణతో పాటు పలువురు సంఘం నాయకులు, కార్యకర్తలు పాల్గొన్నారు.
No comments:
Post a Comment